യുപിഐ ഇടപാടുകൾക്ക് വ്യാപാരികളിൽ നിന്ന് ചാർജ് ഈടാക്കാം: പുതിയ നിയമ ഭേദഗതിക്ക് രാഷ്ട്രപതിയുടെ അംഗീകാരം

യുപിഐ ഇടപാടുകൾക്ക് വ്യാപാരികളിൽ നിന്ന് മർച്ചന്റ് ഡിസ്കൗണ്ട് റേറ്റ് (എംഡിആർ) ഈടാക്കുന്നതിന് വഴിതുറക്കുന്ന നിയമ ഭേദഗതി ബില്ലിന് രാഷ്ട്രപതിയുടെ അംഗീകാരം ലഭിച്ചു. ഇതോടെ യുപിഐ ഇടപാടുകൾക്ക് ചാർജ് ഏർപ്പെടുത്തുന്നത് നിയമപരമായി പ്രാബല്യത്തിൽ വന്നിരിക്കുകയാണ്. ഭാവിയിൽ ഏതൊക്കെ പെയ്മെന്റുകൾക്കാണ് എംഡിആർ ബാധകമാകുകയെന്ന് ഇനി വെറുമൊരു സർക്കാർ വിജ്ഞാപനത്തിലൂടെ തീരുമാനിക്കാൻ കേന്ദ്ര സർക്കാരിന് അധികാരം ലഭിക്കും.

ഡിജിറ്റൽ പണമിടപാടുകൾ പ്രോത്സാഹിപ്പിക്കുന്നതിന്റെ ഭാഗമായി 2020 ജനുവരി മുതൽ യുപിഐ ഇടപാടുകൾക്കും റൂപേ ഡെബിറ്റ് കാർഡുകൾക്കും കേന്ദ്ര സർക്കാർ എംഡിആർ ഒഴിവാക്കി നൽകിയിരുന്നു. ഇതിനാൽ നിലവിൽ യുപിഐ വഴി പണം സ്വീകരിക്കുന്നതിന് വ്യാപാരികൾ ബാങ്കുകൾക്കോ പെയ്മെന്റ് സേവന ദാതാക്കൾക്കോ യാതൊരുവിധ സർവീസ് ചാർജുകളും നൽകേണ്ടതില്ലായിരുന്നു. എന്നാൽ പുതിയ നിയമ നിർമ്മാണത്തോടെ ഈ സൗജന്യ സേവന രീതിയിൽ മാറ്റം വരികയാണ്.

ഡിജിറ്റൽ ഇടപാടുകൾ നടത്തുമ്പോൾ അതിന് പിന്നിൽ പ്രവർത്തിക്കുന്ന ബാങ്കുകളും പെയ്മെന്റ് സേവന ദാതാക്കളും വ്യാപാരികളിൽ നിന്ന് ഈടാക്കുന്ന സേവന അധിഷ്ഠിത നിരക്കാണ് മർച്ചന്റ് ഡിസ്കൗണ്ട് റേറ്റ് അല്ലെങ്കിൽ എംഡിആർ. നിലവിൽ ഡെബിറ്റ്, ക്രെഡിറ്റ് കാർഡ് ഇടപാടുകൾക്ക് വ്യാപാരികൾ ഈ തുക നൽകുന്നുണ്ട്. ബാങ്കുകളുടെയും ഫിൻടെക് കമ്പനികളുടെയും സാമ്പത്തിക ബാധ്യത കുറയ്ക്കുന്നതിനും ഡിജിറ്റൽ അടിസ്ഥാന സൗകര്യങ്ങൾ കൂടുതൽ മെച്ചപ്പെടുത്തുന്നതിനുമാണ് യുപിഐയിലും ഈ നിരക്ക് ബാധകമാക്കാൻ നീക്കം നടത്തുന്നത്.

പുതിയ ഉത്തരവ് പ്രകാരം തുടക്കത്തിൽ വ്യാപാരികളിൽ നിന്നാണ് സർവീസ് ചാർജ് ഈടാക്കുകയെങ്കിലും, ഈ ബാധ്യത ക്രമേണ സാധാരണക്കാരായ ഉപയോക്താക്കളിലേക്ക് എത്തിയേക്കാമെന്ന ആശങ്ക നിലനിൽക്കുന്നുണ്ട്. വ്യാപാരികൾ തങ്ങൾ നൽകേണ്ടി വരുന്ന അധിക തുക ഉൽപ്പന്നങ്ങളുടെയോ സേവനങ്ങളുടെയോ വിലയിൽ ഉൾപ്പെടുത്തി ഉപഭോക്താക്കളിൽ നിന്ന് ഈടാക്കാൻ സാധ്യതയേറെയാണ്. എങ്കിലും ഏതൊക്കെ തരം യുപിഐ ഇടപാടുകൾക്കാവും നിരക്ക് ബാധകമാക്കുക എന്ന കാര്യത്തിൽ ഔദ്യോഗിക വിജ്ഞാപനം വന്നതിനു ശേഷം മാത്രമേ പൂർണ്ണമായ വ്യക്തത ലഭിക്കൂ.

Content Highlights:The President has approved a legal amendment enabling the levy of Merchant Discount Rate (MDR) on UPI transactions.The free service regime active since January 2020 for UPI and RuPay debit cards is coming to an end.The central government now holds the power to specify which payment types will attract MDR via future notifications.